Пред споменикот на Гоце Делчев на площадот Македонија во Благоевград беше одбележана 122-та годишнина од Илинденско-Преображенското востание

Со церемонија пред споменикот на Гоце Делчев на плоштадот „Македонија“ во Благоевград беа одбележани 122 години од избувнувањето на Илинденско-Преображенското востание, јавува Пиринско.

„Востанието од 1903 година не е само историски факт. Тоа е продолжение на големата револуционерна борба на бугарскиот народ – борба која не само што ја донесе слободата, туку ја оформи и идеологијата на бугарската државност. Васил Левски и Гоце Делчев се најголемите наши синови. Не затоа што беа само добри организатори. Не затоа што беа харизматични и импресивни мажи. Туку затоа што беа идеолози на бугарската државност, која е многу јасно определена. Бугаринoт е верник, а верата секогаш бара слобода. Бугаринoт е Европеец – „да бидеме рамноправни со другите европски народи“, ни вели Васил Левски. Бугаринoт е и демократ – тоа е дефиницијата за тоа што сме ние. И денес, кога ја оддаваме почитта кон овие големи мажи, треба да излеземе надвор од ритуалот и преку верата да се потсетиме што ни оставија тие, и да го претвораме тоа во дело секој ден од нашиот живот. Слава на хероите и повод за размислување за сите денешни Бугари“, рече во својот говор градоначалникот на Благоевград, Методи Бајкушев.

Во знак на почит кон хероите загинати за слободата на Бугарија, цвеќе положија градоначалникот Методи Бајкушев, заменик-областниот управител Христо Ангелов, претседателката на Општинскиот совет Антоанета Богданова, командантот на 3-та бригадна команда полковник Кирил Спаневиков, претставници на институции, јавни личности и граѓани.

Одбележувањата започнаа порано во текот на денот со панихида и полагање на цвеќе пред спомен-плочата на семејството Делчеви во дворот на црквата „Воведението на Пресвета Богородица“.

Беше откриена и спомен-плоча на првиот почесен граѓанин на Благоевград, Леон Ламуш. Таа се наоѓа во паркот до зградата на Камерната опера и Народното читалиште „Никола Вапцаров – 1866“.

Во програмата учествуваа актерот од Драмски театар „Никола Вапцаров“ – Благоевград, Александар Митев и научниот секретар на Македонскиот научен институт, Снежана Захариева.