Премиерот Димитар Ковачевски, се сретна со Флоријан Ќехаја, новиот амбасадор на Република Косово во земјава.
На состанокот е констатирано дека Македонија и Косово имаат пријателски и конструктивни билатерални односи, базирани на дијалог и без отворени прашања, соопшти владината прес-служба.
Во соопштението се наведува дека заеднички е оценето дека определеноста и на Македонија и на Косово, кон развој на добрососедските односи е значајно за напредокот на целиот регион.
Во таа насока, како што стои, премиерот Ковачевски го поздрави постигнатиот договор околу документите помеѓу Косово и Србија и соопшти дека нашата држава поддржува натамошен дијалог помеѓу Белград и Приштина со цел нормализирање на односите и со тоа гарантирање на мирот, стабилноста, безбедноста на целиот регион.
На средбата се поздравени напредокот на Македонија во евроинтеграциите и почетокот на преговорите, по членството на НАТО, како и политиките на премиерот Ковачевски и на Владата кон перспективи на граѓаните и на државата.
На состанокот е разговарано за унапредување на соработката меѓу двете држави во процедурите за гранични олеснувања и за други актуелни прашања, како што се состојбите во енергетиката.
Исто така разгледани се можностите околу терминот на одржување на втората меѓувладина седница помеѓу Македонија и Косово во текот на 2022 година, се наведува во соопштението од Владата.
