Протест во поддршка на Ива Михаилова пред судот во Кочани

Пред Основниот суд во Кочани денеска се одржува протест во поддршка на бугарската државјанка Ива Михаилова, која речиси една година не може да го напушти градот и да замине на лекување во Бугарија, јавува БНТ.

Михаилова беше тешко повредена во сообраќајна несреќа на патот кон Штип на почетокот на октомври минатата година. Денеска продолжи судењето, на кое се очекува да биде сослушан последниот сведок – полицаец кој во моментот на несреќата запирал возила за контрола.

Пред судот треба да бидат презентирани и наодите од три вештачења. Според едното, Михаилова преминала во спротивната коловозна лента, додека другите две утврдуваат дека возилото од спротивната насока навлегло околу 90 сантиметри до еден метар во нејзината лента при заобиколување запрено возило.

На рочиштето присуствуваат и бугарски пратеници од пратеничките групи на „Прогресивна Бугарија“, ГЕРБ-СДС, „Демократска Бугарија“ и „Преродба“, како и тим адвокати од Бугарија кои доброволно го следат процесот.

Според медицински документи издадени во изминатите 11 месеци, потребниот метод за лекување на Михаилова не се применува во Северна Македонија, туку е достапен во Бугарија, Турција и Израел. Апелациониот суд во Штип претходно не ѝ дозволи да ја напушти земјата за лекување, со образложение дека може да биде лекувана во Северна Македонија.

Се очекува судот да одлучи за натамошниот тек на постапката и за барањето Михаилова да се лекува во странство.