Првата група учесници во 35. бугарска антарктичка експедиција утре заминува за Антарктикот

Првата група учесници во 35. Национална антарктичка експедиција на Бугарија утре ќе замине од софискиот аеродром „Васил Левски“ кон Антарктикот, соопшти Бугарскиот антарктички институт.

Групата, составена од десет членови, меѓу кои командирот на бугарската антарктичка база Камен Недков, лекар, биолог и технички персонал, ќе патува преку Рим, Сао Паоло и Сантијаго до чилеанскиот град Пунта Аренас.

Таму ќе им се приклучат тројца американски научници, по што со чилеански воен брод ќе продолжат кон островот Ливингстон, каде што се наоѓа бугарската антарктичка станица „Св. Климент Охридски“.

Главната задача на групата е повторно да ја стави базата во функција по зимскиот период и да ја подготви за пристигнувањето на следните учесници.

Во експедицијата ќе учествуваат вкупно 125 лица од 13 држави, а предвидена е реализација на повеќе од 35 научни проекти.

Раководителот на бугарските антарктички експедиции, проф. Христо Пимпирев, најави дека во рамките на годинашната мисија ќе биде воспоставен и бугарски теренски камп на островот Смит, со што истражувачките активности ќе се прошират и надвор од островот Ливингстон.