Првото издание на поемата „Горски патник“ од Георги С. Раковски од 1857 година може да се види во читалната на бугарскиот парламент

Библиотеката на Народното собрание на Бугарија во ноември изложува библиографска реткост – првото издание на поемата „Горски патник“ од 1857 година, соопшти прес-службата на Парламентот, пренесува БТА.

Делото на бугарскиот револуционер и преродбеник Георги С. Раковски е отпечатено во Нови Сад и се наоѓа во сопственост на парламентарната библиотека уште од времето на Кнежевството Бугарија.

„Горски патник“ се смета за првата бугарска поема посветена на ајдучкото движење, а во неа се користат и епизоди од биографијата на Раковски. Според Парламентот, делото инспирирало повеќе бугарски револуционери и има значајно место во развојот на преродбеничката литература.

Книгата на месецот е избрана по предлог на претседателката на Парламентот Михаела Доцова, по повод Денот на народните будители.

Изданието може да се види во читалната на Народното собрание на плоштадот „Александар I“ бр. 1 во Софија.