Радев на средбата со Митрофанова: Нападите врз трговски бродови во Црното Море се апсолутно недозволиви

Нашата земја не располага со категорични докази за потеклото на дроновите употребени во нападите, но нема логика Украина да ги уништува сопствените бродови во Црното Море, а резултатите од овие удари се во корист на Русија. Ова го изјави премиерот Румен Радев пред амбасадорката на Руската Федерација во Бугарија, Елеонора Митрофанова, за време на средбата меѓу двајцата во Советот на министри, соопшти владината информативна прес-служба, пренесува БТА.

Митрофанова изјави дека ја разбира оваа логика, но дека не располага со никакви информации од Министерството за одбрана на Руската Федерација поврзани со последните напади врз трговски бродови во Црното Море. Истовремено, таа додаде дека не ја исклучува ниту логиката овие напади врз трговски бродови во близина на бугарските територијални води да претставуваат провокација од трета страна.

Премиерот Радев нагласи дека нападите врз трговски бродови во Црното Море се апсолутно недозволиви и водат до значителна ескалација на конфликтот. Бугарија ќе продолжи со истрагата за нападите заедно со своите сојузници од ЕУ и НАТО со цел да се утврди вистината, додаде тој.

Иако не е страна во војната, Бугарија трпи значителни економски и финансиски штети. Нападите во Црното Море веќе доведоа до зголемување на ризикот за трговската пловидба, до зголемување на цените на осигурувањето, па дури и до одбивање да се превезува товар до бугарските пристаништа. Тоа ги поскапува и ги загрозува и испораките на нафта до рафинеријата во Бургас, нагласи уште бугарскиот премиер.

За време на разговорот, премиерот Радев исто така изјави дека Бугарија ќе иницира разговори со Романија и Турција за излегување со заеднички предлози за гарантирање на безбедноста на пловидбата во Црното Море.

Премиерот Румен Радев утрово соопшти за нови напади со дронови врз бродови во Црното Море и ги оцени како апсолутно недозволиви. Со три воздушни дрона е погоден брод на 18 милји источно од Бјала, а друг брод е погоден на 17 милји источно од Крапец, при што потонал.

Во телефонски разговори со претседателката на Европската комисија (ЕК), Урсула фон дер Лајен, и генералниот секретар на НАТО, Марк Руте, премиерот Румен Радев повика на заеднички напори за запирање на нападите врз трговски бродови во Црното Море, соопшти прес-службата на Советот на министри.