Радев: Вселенскиот и технолошки центар во Доброславци ќе создаде нови можности за инвестиции, научни истражувања и високотехнолошко производство

Бугарската влада одобри проект на Меморандум за разбирање меѓу Владата на Република Бугарија и компанијата „Старбејс Јуроп“ во врска со реализацијата на приоритетниот инвестициски проект „Високотехнолошки индустриски парк и вселенски и одбранбен развоен центар – Доброславци“.

Проектот предвидува создавање високотехнолошка индустриска зона со фокус врз вселенските технологии, одбранбената индустрија, научноистражувачката и развојната дејност. Предвидено е таа да се развива преку јавно-приватно партнерство.

„Од денес ги отвораме вратите за иновативни бугарски компании и бизнис-лидери кои имаат смели амбиции, смели визии и, пред сè, докажан меѓународен успех во иновативните индустрии“, изјави премиерот Румен Радев при посетата на локацијата.

Тој посочи дека аеродромот Доброславци ја прекинал активната летачка дејност пред 25 години, а во 2023 година, за време на службената влада предводена од Галаб Донев, била донесена одлука таму да се формира економска зона за привлекување инвестиции во високите технологии.

Пистата на аеродромот ќе ја задржи својата функција и е предвидено да биде реконструирана и продолжена. Таа и натаму ќе се користи како база за обука на Националната служба за обезбедување.

Според Радев, проектот треба да го поттикне развојот на општините во регионот и да создаде нови можности за инвестиции, научни истражувања и високотехнолошко производство.

Во рамките на иницијативата е планирана и изградба на Национален центар за набљудување, координација и управување со податоци од вселената. Центарот треба да ѝ овозможи на државата поефикасно да управува со важни процеси во различни општествени и економски области.

„Ова е слика на економската политика на Владата – инвестиции во економијата на знаењето, во високотехнолошкото производство, научните истражувања и развојот. Се надевам дека на овој начин ќе ја претвориме Бугарија од земја што користи технологии во земја што ги создава“, рече Радев.

Тој додаде дека успехот на проектот нема да се мери само според вредноста на инвестициите и бројот на нови работни места, туку и според можноста Бугарија да ги развива и задржува младите таленти и да обезбеди место во индустриите на иднината.

Основачот на компанијата за сателитски технологии „ЕндуроСат“, Рајчо Рајчев, изјави дека амбицијата е во Доброславци да биде создаден еден од најголемите вселенски и одбранбени развојни центри во Европа.

„Проектот е многу сложен и голем. Нашата амбиција е овде да изградиме целосен центар за склопување, тестирање и квалификација на новите генерации сателити, како и развоен и образовен кампус“, рече Рајчев.

Градоначалникот на Нови Искар, Владислав Владимиров, оцени дека проектот ќе донесе нови работни места и ќе го обнови просторот кој со години бил оставен да пропаѓа.

На настанот присуствуваа и вицепремиерите Александар Пулев и Атанас Пеканов.