Рок-легендата Били Ајдол за првпат ќе настапи во Софија на 4 јули 2027 година

Британската рок-ѕвезда Били Ајдол за првпат ќе одржи концерт во Софија, Бугарија, на 4 јули 2027 година, во рамките на фестивалот „Release Sofia Festival“. Настапот ќе се одржи во „Sofia Live Park“, а организаторите најавуваат дека наскоро ќе бидат објавени и други изведувачи од фестивалската програма, јавува Актуално.

Со музичка кариера долга речиси пет децении, Били Ајдол е еден од најпрепознатливите претставници на рок и панк-музиката. Од 1977 до 1981 година беше фронтмен на британската панк-група „Generation X“, а во 1982 година започна соло-кариера во соработка со гитаристот Стив Стивенс.

Меѓу неговите најпознати хитови се „Dancing With Myself“, „White Wedding“, „Rebel Yell“, „Eyes Without A Face“, „Flesh For Fantasy“ и „Cradle of Love“.

Во 2025 година го објави албумот „Dream Into It“, негов прв студиски албум со нов авторски материјал по 11 години. Во 2026 година беше објавен и документарниот филм „Billy Idol Should Be Dead“, посветен на неговиот живот и музичка кариера.

Продажбата на билетите за концертот во Софија започнува на 14 ноември 2026 година, во 11 часот, по почетна цена од 65 евра, преку интернет-страниците releasesofia.bg и more.com.

Ќе бидат достапни и ограничен број ВИП-билети по цена од 250 евра, кои вклучуваат паркинг, посебна зона со седишта, пијалаци, приоритетен влез и други погодности.

Дополнителни информации за фестивалската програма и категориите билети ќе бидат објавени на официјалната интернет-страница на фестивалот.