Руски дрон го погоди Бернардинскиот гркокатолички манастир во Лвив, дел од наследството на УНЕСКО
Во вторникот, 24 март 2026 година, руски дрон удри во Бернардинската црква и манастир во центарот на Лвив, предизвикувајќи сериозни оштетувања на комплексот, вклучително и на камбанаријата. Објектот е дел од историскиот центар на градот, кој е впишан на листата на УНЕСКО од 1998 година, пишува балканистот Евлоги Станчев во Фактор.
Нападот беше дел од „најмасовната руска воздушна атака од почетокот на целосната војна против Украина“, при што во еден ден беа лансирани околу 1000 дронови врз повеќе украински региони. Загинаа неколку лица, меѓу кои и бебе старо само неколку дена.
Бернардинскиот манастир е значаен симбол на културното и религиско наследство на Западна Украина, поврзан со гркокатоличката заедница, која потекнува од Брестката унија (1596). Заедницата, позната и како „унијати“, историски била предмет на репресии од руската власт, која ги сметала за „предавници“ и „одпадници“ од „единствениот“ православен простор.
Во текстот се нагласува дека нападот е „валкан, циничен удар“ врз украинското културно наследство и израз на „длабока, неприкриена омраза“ кон католиците од источен обред. Денес, во окупираните територии, гркокатолиците повторно се соочуваат со прогон, затворање на храмови и апсења на свештеници.
Историски, најтешкиот удар врз оваа заедница бил т.н. Лвовски собор од 1946 година, кога унијата била укината, а црквата формално ликвидирана – период што се смета за „врховно испитание за гркокатолиците“.
