САД и Бугарија им оддадоа почит на загинатите припадници на органите на редот

Во Амбасадата на САД во Софија беше одржана церемонија по повод Денот на припадниците на безбедносните органи, при што беше оддадена почит на загинатите полицајци и припадници на безбедносните служби на САД и на Бугарија, јавува БГНЕС.

На настанот присуствуваа вршителката на должност заменик-шеф на американската амбасада Никол Фокс, бугарскиот министер за внатрешни работи Иван Демерџиев и вршителот на должност главен секретар на МВР Георги Кандев.

Регионалниот службеник за безбедност Кит Истер ја истакна долгогодишната соработка меѓу двете земји во областа на граничната безбедност, борбата против организираниот криминал и трговијата со дрога. „Секоја спречена закана, секој криминалец изведен пред правдата и секој спасен човечки живот се продолжение на нивната мисија“, изјави тој.

Министерот Демерџиев нагласи дека соработката меѓу САД и Бугарија се темели на доверба и заеднички демократски вредности. „Загинатите припадници на органите на редот се наши современи херои — тие ги жртвуваа своите животи за да ја заштитат нашата безбедност“, рече тој.

По повод денот на сеќавање, знамињата во Амбасадата на САД во Софија беа спуштени на половина копје.