Се вратија бугарските пожарникари што учествуваа во гаснењето на пожарите во Шпанија
Бугарските пожарникари што учествуваа во гаснењето на шумските пожари во Шпанија, се вратија во Бугарија со авион „Спартан“ на бугарските Военовоздухопловни сили, јавува БТА.
Пожарникарите беа пречекани од директорот на Главната дирекција „Противпожарна безбедност и заштита на населението“ (ГДПБЗН), соопшти бугарската национална противпожарна служба на својата страница на Фејсбук.
Од службата потсетуваат дека две смени, секоја составена од по 20 пожарникари, во период од четири недели им помагале на шпанските власти во справувањето со шумските пожари.
Екипите на ГДПБЗН учествувале во локализирањето и гаснењето на повеќе шумски пожари. Покрај бугарските пожарникари, во интервенциите биле вклучени десетици екипи на локалните служби, како и неколку авиони и хеликоптери.
Распоредувањето на бугарските пожарникари во Кралството Шпанија било реализирано преку Механизмот за цивилна заштита на Европската Унија.
