Шефот на бугарската дипломатија Иван Кондов на Форумот „ЕУ се среќава со Балканот“: Бугарите во РС Македонија се соочуваат со голем број препреки
Бугарското претседателство со Советот на ЕУ во 2018 година даде силен поттик за европската интеграција на земјите од Западен Балкан, но политиката на проширување не треба да се сфаќа како автоматско средство за справување со политичките, економските и социјалните предизвици во регионот. Таа може да понуди трансформативна моќ само со активирање на големи демократски реформи во најдобар интерес на граѓаните. Ова го истакна бугарскиот министер за надворешни работи Иван Кондов на отворањето на Meѓународниот форум „ЕУ се среќава со Балканот“ што се одржа во вчера во Софија.
Настанот организиран од Европскиот либерален форум, заедно со партијата АЛДЕ и Атлантскиот клуб во Бугарија, втора година по ред собра високи претставници на ЕУ, сегашни и поранешни министри од регионот, дипломати, јавни личности, аналитичари , итн. Форумот се фокусираше на предизвиците и иднината на европската политика за проширување – 50 години по првото проширување на ЕУ и во контекст на новата реалност и безбедносните закани.
Министерот Кондов ги истакна важните позитивни случувања во регионот, вклучително и почетокот на пристапните преговори со Албанија, одржувањето на првата меѓувладина конференција за отпочнување на фазата на отворање на преговорите со Република Северна Македонија, доделувањето статус на земја кандидат за Босна и Херцеговина и либерализацијата на визниот режим за граѓани на Косово.
Во истото време, тој ги истакна загрижувачките повлекувања во клучните области на владеењето на правото, слободата на медиумите и човековите права. Министерот изрази мислење дека наследството од минатото создава ранливост што го отежнува влезот во агендата на ЕУ. Има раширени дезинформации, пропаганда против ЕУ, затоа мора да ја поддржиме слободата на медиумите, човековите права и да се бориме против говорот на омраза“, посочи Кондов. Тој даде пример за односот кон Бугарите во РСМ: „Така, на пример, Бугарите во Република Северна Македонија се соочуваат со многу препреки: од затворање на нивните здруженија до недостиг на соодветна истрага за нападите врз нив, а исто така и обвиненија против нивните лидери“.
