Шолц-Денков: Бугарија и Романија ја имаат поддршката на Германија за влез во Шенген зоната

„Бугарија и Романија ја имаат мојата поддршка да станат полноправни членки на Шенген. Германија во иднина ќе се залага за истото пред партнерите од ЕУ. Ова го изјави германскиот канцелар Олаф Шолц на заедничката прес-конференција со бугарскиот премиер Николај Денков во Берлин.

Претходно двајцата лидери одржаа средба на која разговараа за теми поврзани со Шенген, Западен Балкан и војната во Украина.

„Односите меѓу Германија и Бугарија се одлични и разновидни и ние сакаме да ја продлабочиме оваа соработка денес. Нашите економски односи се навистина многу успешни. Во последната година постигнавме трговски рекорд – 12 милијарди евра. Бугарските производи, особено тие за нашата автомобилска индустрија се особено барани во Германија. Повеќе увезуваме од Бугарија отколку извезуваме во Бугарија“, рече германскиот канцелар.

Според Шолц, Бугарија е доверлив партнер и во ЕУ и во НАТО, што е видливо по реакцијата на руската агресија во Украина.

„Ние работиме многу тесно меѓу себе, владата во Софија категорично и јасно застана на страната на Украина, за што експресно сакам да ви се заблагодарам“, му се обрати Шолц на Денков.

Канцеларот истакна и дека Германија „со интерес ги набљудува“ реформите во правосудниот систем кај нас, бидејќи „владеењето на правото е едно од најважните достигнувања во ЕУ“.

Денков и Шолц повторно ќе се сретнат во наредните денови, во рамките на состанокот на Европската политичка заедница и неформалниот Европски совет. Се очекува да се разговара за состојбите во ЕУ, Западен Балкан како и за односите со соседите. Во фокусот ќе бидат и конфликтите меѓу Азербејџан и Ерменија и меѓу Србија и Косово.

„Заедно со канцеларот се согласуваме дека мора да има извонреден фокус на заштитата на надворешните граници, на помагањето на земјите кои се под најголем притисок, бидејќи ако не успееме да го одржиме овој прилив на мигранти на ниско ниво, сите можни опции за прераспределба нема да го решат прашањето, едноставно ќе го одложат и ќе го прераспределат како проблем од една во друга држава“, коментира Николај Денков.

Премиерот изјави дека сите земји од Западен Балкан треба да се интегрираат како полноправни европски држави.

„Земјите од Западен Балкан навистина можат да станат членки на ЕУ. Во Солун пред 20 години ја дадовме првата потврда. Истото важи и за Република Северна Македонија. РСМ може да обрне внимание на релевантните одлуки и ние во моментов сакаме заеднички да ги водиме овие процеси. Верувам дека тоа ќе се направи во тесна соработка и со Бугарија“.

Германија не е само еден од најголемите инвеститори во Бугарија – двете земји со години изградија многу стабилни врски во областа на науката, истакна уште бугарскиот премиер академик Николај Денков.