„SoAlive“ во октомври ќе собере над 300 претставници на светската музичка индустрија во Софија
Четвртото издание на музичката конференција и фестивал „SoAlive“ ќе се одржи од 14 до 16 октомври 2026 година во Софија, со учество на повеќе од 300 говорници и претставници на водечки светски музички компании, фестивали, агенции, платформи и медиуми, јавува Актуално.
Најавено е присуство на претставници од „Spotify“, „Apple Music“, „Deezer“, „Universal Music“, „The Orchard“, „Goldenvoice“, „Sziget“, „EXIT“, WME и UTA. Во 2025 година на конференцијата учествуваа над 1.000 делегати од 57 држави.
Во програмата ќе учествуваат коосновачот на „The Orchard“, Скот Коен, музичкиот супервизор Томас Голубиќ, познат по сериите „Breaking Bad“ и „Better Call Saul“, директорот на „Sziget“, Тамаш Кадар, и раководителот за букинг во „Spotify“, Крис Сампсон. Посебно обраќање ќе има и бугарската поп-ѕвезда ДАРА.
Главни теми ќе бидат влијанието на вештачката интелигенција врз создавањето и дистрибуцијата на музика, заштитата на авторските права, независната дистрибуција, иднината на концертната индустрија и улогата на медиумите и алгоритмите. Програмата „East of the Future“ ќе ги поврзе музичките професионалци од Југоисточна Европа со пазари од Јапонија, Кина, Тајланд и други азиско-пацифички земји.
„Југоисточна Европа веќе не е на периферијата на картата, туку станува дел од главниот круг“, изјави основачката на „SoAlive“, Рут Колева.
Паралелно со конференцијата, во повеќе клубови и концертни простори во Софија ќе се одржат над 50 настапи на изведувачи од Бугарија, Балканот и Европа. Влезот за сите концерти ќе биде бесплатен, додека пристапот до професионалната програма ќе биде со акредитација.
