Социјалните претпријатија во Бугарија создадоа работни места за над 1.200 лица

Работни места за вкупно 1.216 лица е резултатот на активните 90 социјални претпријатија запишани во регистарот на Министерството за труд и социјална политика (МТСП). Од нив, 524 се за лица од ранливи групи – меѓу нив има и лица со траен инвалидитет, долгорочно невработени кои имаат право на социјална помош, млади лица до 29 години без професионално искуство, невработени над 55 години, бегалци што имаат  добиено заштита во Бугарија, жртви на семејно насилство и сл.

Во последните две години 17 од социјалните претпријатија вработиле вкупно 90 странци кои добиле заштита во Р. Бугарија според Законот за азил и бегалци, а речиси 80 од нив се од Украина.

„Обезбедувањето вработување на украинците кои нашле засолниште во Бугарија од војната е начин за нив да се интегрираат како полноправни членови на општеството, да ги вратат своите работни навики и да придонесат со своето знаење и вештини за развојот на економијата“, коментираат МТСП.

Од таму напоменуваат дека приоритет е поддршката на социјалната и солидарната економија која е главен фактор за интегрирање на лицата од ранливите групи на пазарот на трудот преку создавање работни навики и обезбедување вработување за нив.

Овој приоритет е вграден во проектот „Развој на социјалната економија“, финансиран со инвестиции од Националниот план за закрепнување и одржливост. Развојот на регионалниот административен капацитет и поддршката на модернизацијата на претпријатијата од социјалната и солидарната економија се меѓу главните задачи. Според истиот проект, создадени се шест регионални центри за развој на социјалната економија, велат од МТСП. Според т.н. фокус – точки од јуни 2023 година до крајот на јули 2024 година имаат извршено над 4.800 консултации со институции, физички и правни лица со цел градење на мрежи за соработка.

МТСП во јуни забележа двоен раст на социјалните претпријатија запишани во посебниот регистар по започнувањето на проектот „Развој на социјалната економија“.

Фото: БТА