Софиската филхармонија за прв пат ќе свири во салата на Берлинската филхармонија
Концертот е во чест на 60-годишнината од формирањето на Бугарскиот културен институт во Берлин
На 12 декември со свечен концерт во салата на Берлинската филхармонија ќе се одбележи 60-годишнината од формирањето на Бугарскиот културен институт во германската престолнина. По покана од својот директор Борислав Петранов, националниот оркестар – Софиската филхармонија, за прв пат ќе настапи на оваа исклучително престижна европска сцена. Под диригентската палка на Најден Тодоров ќе биде изведено едно од најпопуларните бугарски класични дела – Концертот за пијано и оркестар бр.3 од Панчо Владигеров, а солист ќе биде Људмил Ангелов. Во вториот дел, филхармонијата ни ја подготвува четвртата симфонија од Феликс Менделсон-Бартолди, наречена „Италијанска“.
На 26 ноември, Софиската филхармонија го посети Загреб, Хрватска, и доби одлични критики за целосната Менделсон програма во која како солист се појави виолинистот Веско Ешкенази. Концертот беше дел од саботниот циклус на салата “Лисински“, во кој гостуваат престижни состави од цела Европа, меѓу кои Лондонската кралска филхармонија, симфонискиот оркестар на Монтреал, Чешката филхармонија и други.
Сите средби со саканата публика во декември ќе бидат празнични – како солисти ќе ги поздравиме виолинистот Даниел Хоуп, тандемот Људмил Ангелов и Росен Миланов, пијанистката Милена Моллова, брилијантните пејачи Роландо Вијасон и Светлина Стојанова.
Во меѓувреме, директорот на музичката институција Најден Тодоров ги објави имињата на ѕвездите во втората полусезона. Љубителите на музиката повторно ќе можат да се чувствуваат како да се во големите културни метрополи, каде што гостува елитата на музичкиот свет: За прв пат ќе му аплаудираме на тенорот Роберто Алања, диригентот Андре Ороско-Естрада, виолинистката Бомсори Ким , виолончелистката Јулија Хаген. Џошуа Бел, Сергеј Накарјаков, Сергеј Хачатрјан, Елена Башкирова, Валентина Лисица, Јулијан Рахлин и Сара Макелрави, сестрите Катја и Мариел Лабек повторно ќе не воодушеват со својата уметност. Од бугарските уметници се издвојуваат имињата на Минчо Минчев, Светлин Русев, Веско Ешкенази, Лија Петрова, Атанас Крстев, Павел Златаров, Петар Македонски, Мартин Цонев и други. Хорот на националната филхармонија ќе се претстави со нови интересни програми под диригентство на Цветан Крумов, Крстин Настев, Јосиф Герџиков и Петар Матев. Ќе продолжи и едукативната програма „Фортисимо“.
Диригентот и директор на Софиската филхармонија, Најден Тодоров, во програмата „Алегро виваче“ на „Хоризонт“ зборуваше за емоциите по гостувањето во Загреб и пред историското прво гостување во Берлинската филхармонија.
