Србија, Бугарија, Грција и Северна Македонија разговараат за заедничката енергетска безбедност
Во Белград почна вториот самит на министрите за енергетика на Србија, Северна Македонија, Грција и Бугарија, посветен на зајакнување на регионалната енергетска поврзаност, новите коридори за снабдување со гас и електрична енергија, како и на енергетската безбедност и стабилноста на системот, пренесува 24 часа.
Средбата се одржува во Палатата на Србија, а на пленарната сесија учествуваат бугарската министерка за енергетика Ива Петрова, српската министерка за рударство и енергетика Дубравка Ѓедовиќ Хандановиќ, грчкиот министер за животна средина и енергетика Ставрос Папаставру и министерката за енергетика, рударство и минерални суровини на Северна Македонија Сања Божиновска.
Меѓу главните теми се промените на европскиот енергетски пазар, диверзификацијата на маршрутите и изворите за снабдување, како и зајакнувањето на енергетската поврзаност меѓу четирите држави.
Посебно внимание се очекува да биде посветено на инфраструктурни проекти што можат да ја зголемат сигурноста и флексибилноста на снабдувањето со природен гас и електрична енергија и да ја намалат зависноста од поединечни маршрути, пренесува БТА.
