Светски познатиот бугарски кавалџија Теодосиј Спасов вечерва настапува на Фестивалот на Универзитетот на Кипар

Бугарскиот кавалџија Теодосиј Спасов и Café Balkan вечерва од 20:30 часот ќе настапат на Фестивалот на Универзитетот на Кипар со концертот „Музички портрети: Од Медитеранот до Балканот“, јавува БНР.

Концертот обединува музичари од различни културни традиции и создава дијалог меѓу современиот звук и традиционалните мелодии.

Музичките приказни обработуваат теми како егзилот, миграцијата и раселувањето, барајќи го заедничкото надвор од националните граници.

Заедно со Спасов на сцената ќе настапат Александрос Гагацис на тапани, Глафкос Контемениотис на пијано и Иринеос Кулурас на контрабас.

„Секоја композиција е портрет. Секој портрет раскажува приказна. Секоја приказна се претвора во мост меѓу културите“, наведуваат организаторите.

Фестивалот на Универзитетот на Кипар се одржува од 5 септември до 11 октомври и во програмата вклучува музички и театарски продукции од Кипар, Грција, Шпанија, Велика Британија, Бугарија, САД и други земји.