Светските вицешампиони во одбојка се вратија во Бугарија

Светските вицешампиони во одбојка од Бугарија се вратија на домашна почва по историското финале на Светското првенство во Филипини, каде што загубија само во финалето против Италија со 1:3 во сетови, јавува БГНЕС.

Одбојкарите на селекторот Џанлоренцо Бленџини беа свечено пречекани од гардисти и претставници на Владата, а спортскиот министер им врачи лаворови венци и цвеќиња. За освоеното второ место, репрезентативците ќе поделат награден фонд од 520.000 лева.

Алекс Николов: „Ова е тимска заслуга“

Најдобриот реализатор на Светското првенство, Александар Николов, истакна дека сребрениот медал е резултат на колективна сила:
„Заслуживме сребро со тимски дух, не е случајно што сме овде. Осознавме дека можеме да направиме нешто големо кога излеговме први од групата. Пред една година се зборуваше дали воопшто ќе победиме натпревар. Тоа ни даде самодоверба. Многу сум горд и радосен за ова постигнување,“ изјави Николов.

Тој додаде дека индивидуалните награди не се поважни од медалот: „Одбојката ја играат седум играчи. Ако некој не ми ја подаде топката, нема да можам да нападам. Ова е тимска заслуга“.

Симеон Николов: „Ова е само почеток“

Пред медиумите зборуваше и неговиот брат Симеон, кој нагласи дека ова е само првиот чекор во националниот тим:
„Си ветив на себе си дека ова е само почеток во репрезентацијата. Имавме огромна поддршка во Филипини – после нивната репрезентација, нас не поддржуваа најмногу. Тоа многу ни помогна да победуваме,“ рече помладиот Николов.

Во однос на неговиот трансфер во Русија, во тимот на Пламен Константинов – Локомотив Новосибирск, Симеон објасни: „Ова е чекор напред, а не назад. Ќе имам повеќе играчко време и можност да се развивам. Моја цел е секоја година да бидам подобар“.