ТЕХНИЧКИОТ ПРЕМИЕР ЌЕ БИДЕ ПОЗНАТ КОН КРАЈОТ НА СЛЕДНАТА НЕДЕЛА
Кон крајот на следната недела ќе биде познато името на техничкиот премиер, откако следниот петок ќе заседава Централниот одбор на партијата, а претходно ќе се состане и Извршниот одбор.
Ова го изјави денеска премиерот Зоран Заев одговарајќи на новинарско прашање по неформалната средба со пензионерите, на која присуствуваа и министерката за труд и социјална политика Мила Царовска и министерот за здравство Венко Филипче.
Како можни технички премиери медиумите ги споменуваа министерот за внатрешни работи Оливер Спасовски и министерката Царовска, а таа денеска на прашањето дали е подготвена да ја води владата како технички премиер рече дека не станува збор за тоа дали некој е подготвен.
