Трет натпревар по ораторство на бугарски јазик се одржува во Токио

Третиот натпревар по ораторско мајсторство на бугарски јазик во Јапонија се одржува денеска, 14 декември, во Токио. Настанот е организиран од Амбасадата на Бугарија во Јапонија во соработка со Токискиот универзитет за странски студии, соопшти бугарската дипломатска мисија, пренесува БТА.

Учесниците се поделени во три категории: „Почетно и средно ниво – студенти“, „Напредно ниво – студенти“ и „Вработени“. Секој учесник ќе одржи говор на бугарски јазик по избрана тема во траење до три минути.

Целта на натпреварот е унапредување на јазичните вештини и поттикнување пријателства меѓу говорителите на бугарски јазик. Ќе бидат доделени прва, втора и трета награда. Првата награда за студент од „Почетно и средно ниво“ е патување во Бугарија, а за „Напредно ниво“ – можност да биде „амбасадор за еден ден“.

Првиот натпревар се одржа на 9 декември 2023 година во Осака, со 19 учесници од цела Јапонија. Победник беше Јуито Рјокава, кој подоцна ја искористи наградата за посета на Бугарија. Второто издание се одржа на 7 декември 2024 година, повторно во Осака. Првото место во категоријата „Вработени“ го освои Масаја Фукумото, а кај студентите победи Тамако Вада од Токискиот универзитет за странски студии, која исто така ја посети Бугарија како дел од наградата.