ВМРО-ДПМНЕ: Бислимоски призна дека поради лошото управување со ЕЛЕМ и криминалните тендери, народот ќе плаќа поскапа струја

Бислимоски призна дека поради лошото управување со ЕЛЕМ и криминалните тендери, народот ќе плаќа поскапа струја, Ковачевски молчи, соопшти ВМРО-ДПМНЕ.

„Марко Бислимоски по 5 години на чело на РКЕ на крај беше искрен со граѓаните и призна дека поради слабото производство на струја од страна на ЕЛЕМ се јавуваат огромни потреби од увоз на струја, која е и до 260 евра за мегават час.

Само поради лошиот менаџмент со РЕК Битола, хидроакумулациите и другите енергетски капацитети народот сега плаќа 30% поскапа струја, а во најава се нови покачувања. Конечно некој од власта искрено да ја признае својата неспособност. Годишните загуби поради недоволното производство на струја од домашните капацитети можат да одат и до 250 милиони евра“, велат од партијата.

Тие 250 милиони евра, како што се наведува, се пари во девизи, кои трајно се одлеваат од Македонија. Според ВМРО-ДПМНЕ, тие пари доколку власта добро менаџира со енергетските капацитети би останале во државата и ќе можат да се инвестираат во енергетски проекти, но наместо тоа, тие се одлеваат за купување скапа струја, а енергетскиот систем е сè послаб и послаб.

„СДСМ буквално нема план за справување со енергетската криза. Тие конечно треба да си ја признаат својата неспособност и да распишат предвремени парламентарни избори, по кои ќе следи нова влада на ВМРО-ДПМНЕ која ќе ја извади државата од криза“, се додава во партиското соопштение.