Во Амбасадата на Бугарија во Албанија се одржа средба со студенти од Универзитетот во Тирана кои го изучуваат бугарскиот јазик

Во Амбасадата на Бугарија во Албанија на 9 јули се одржа средба со студенти од Универзитетот во Тирана кои изучуваат бугарски јазик и учествуваат на шестото издание на Летната школа по бугарски јазик и култура, јавува БТА.

Школата се одржува од 7 до 12 јули 2026 година на Универзитетот во Тирана. Организатори се Факултетот за странски јазици и Катедрата за словенски и балкански јазици, во соработка со Великотрновскиот универзитет „Св. св. Кирил и Методиј“, во рамки на програмата „Еразмус+“ и со поддршка од бугарската амбасада.

На средбата било разговарано за значењето на бугарскиот јазик, можностите што ги нуди неговото изучување и за врските меѓу Бугарија и Албанија. Биле истакнати историските и културните допирни точки меѓу двата народа, како и важноста на образованието, студентската размена и универзитетската соработка за градење трајни односи.

Од дипломатската мисија ја нагласиле и поддршката на Бугарија за европската интеграција на Албанија, оценувајќи дека младите и академската соработка имаат значајна улога во заедничката европска иднина на регионот.

Посебно внимание било посветено на можностите за студирање во Бугарија и на улогата на бугарските универзитети во популаризирањето на бугарскиот јазик, култура и академска традиција меѓу странските студенти.

Во рамки на средбата, почесна грамота му била врачена на доц. д-р Адриатик Дерјај, раководител на Катедрата за словенски и балкански јазици, како признание за неговиот придонес во развојот на бугаристиката и во зајакнувањето на академската соработка меѓу Бугарија и Албанија.

Благодарност им била изразена и на доц. д-р Раки Бело и доц. д-р Миранда Бело за нивната континуирана работа со студентите и за придонесот во развојот на академските врски меѓу двете земји.

Од амбасадата им посакаа успешна и инспиративна програма на учесниците, истакнувајќи дека бугарскиот јазик останува „жив мост меѓу Бугарија и Албанија“.