Во Босилеград беше отворена петтата Меѓународна ликовна колонија „Босилеград во бои 2025“

Во Босилеград беше отворенa Петтaта меѓународна ликовна колонија „Босилеград во бои 2025“. Колонијата ќе трае една седмица, а е во организација на здружението „ГЛАС“ – Босилеград и Студентското читалиште „Св. Климент Охридски 1997“ од Софија, јавува БТА.

Пред официјалното отворање, уметниците го посетија босилеградското село Извор, каде што ја разгледаа црквата „Св. Троица“ и првото килијно училиште во Босилеградскиот регион, изградени во периодот од 1833 до 1835 година.

Отворањето на настанот се одржа во дворот на куќата каде што се наоѓа канцеларијата на здружението „ГЛАС“. Гостите и учесниците имаа можност да погледнат дел од сликите создадени за време на минатогодишното, четврто издание на колонијата.

Во петтото издание учествуваат вкупно 15 уметници – по петмина од три држави. Од Бугарија се Велина Христова, Пенка Минева, Николај Иванов – ОМ, Анатолиј Станкулов и Милен Аврамов. Од Северна Македонија ќе творат Ивана Ивановска, Бојана Тошевска, Роберт Михајловски, Мартин Јакимовски и Тоше Јованов. Од Србија учествуваат Маријана Бајкиќ, Весна Ставреска, Сандра Стоименов, Миролјуб Кршанин – Мики и Љубиша Пенев.

Во текот на следните денови, домаќините ќе ги запознаат уметниците со културно-историските знаменитости на општината, при што се планирани посети на неколку босилеградски села, како и излет до Власинското Езеро. Сите заинтересирани ќе имаат можност да ја посетат и Уметничката галерија „В.Д. Мајстора“ во Ќустендил.

Колонијата нема зададена тематска или жанровска насоченост, со цел учесниците слободно да црпат инспирација и да творат во богатото природно и културно опкружување на Босилеград.

Меѓународната ликовна колонија ќе заврши со изложба на делата создадени за време на настанот. Изложбата ќе биде свечено отворена на 19 јули со почеток во 18:30 часот по локално време, на отворената сцена во дворот на куќата каде што беше одржано и отворањето.