Во Њујорк одбележана 83-годишнината од спасувањето на бугарските Евреи

Во Генералниот конзулат на Бугарија во Њујорк на 12 март се одржа настан по повод 83-годишнината од спасувањето на бугарските Евреи, организиран заедно со Американскиот еврејски комитет, соопшти дипломатското претставништво на Фејсбук, пренесува БТА.

Настанот, под наслов „Паметење, дејствување и превенција: ангажманот на Бугарија во борбата против антисемитизмот во поширокиот трансатлантски контекст“, беше посветен на современите политики за спротивставување на антисемитизмот, инспирирани од историското спасување на речиси 50.000 бугарски Евреи за време на Втората светска војна.

Главен говорник беше проф. Румјана Христиди од Софискиот универзитет „Св. Климент Охридски“, која потсети на традиционалната толеранција меѓу Бугарите и Евреите и истакна дека Бугарија и денес е меѓу земјите со најниско ниво на антисемитизам.

На настанот учествуваше и скулпторката Каја Декелбаум од бугарско-еврејско потекло, која ја претстави својата скулптура „Духот“ како израз на благодарност кон бугарскиот народ. Таа истакна дека „во мрачните години на Втората светска војна Бугарија беше единствената земја во Европа од која дојде светлина и човечност“.

Во дискусијата, модерирана од генералниот конзул Ангел Ангелов, беше нагласено значењето на образованието, историската меморија и меѓународната соработка во спречувањето на антисемитизмот, како и улогата на Бугарската православна црква во спасувањето на бугарските Евреи.

Настанот заврши со музичка програма со дело на бугарскиот композитор од еврејско потекло Милчо Левиев, изведено од израелската виолончелистка и композитор Тамар Сагив. Меѓу присутните имаше дипломати, претставници на еврејски и бугарски организации, академската заедница и членови на бугарската и еврејската заедница во Њујорк.