Во Софија е отворена изложба „Мисирков за Мисирков“ посветена на 90-та годишнина од раѓањето на бугарскиот преведувач Борис С. Мисирков

Фотографска изложба „Мисирков за Мисирков“ се отвори денеска во Софија по повод 90-годишнината од раѓањето на преведувачот Борис Мисирков. Домаќин на изложбата е галеријата „Алма Матер“, информираат од Центарот за култура на Софискиот универзитет (СУ) „Свети Климент Охридски“, кои се организатори на изложбата заедно со Домот за литература и преведување.

Според нив, изложбата е поглед на животот и делото на преведувачот Борис Мисирков од гледна точка на неговиот син, фотографот Борис Мисирков. За тоа се користени две архиви – рачно напишани и фотографски.

„Од патните белешки, писма, уредувачки корекции, белешки за создавањето на преведувачкиот сојуз, се откриваат неочекувани страни на личноста на Мисирков постариот, а од снимките што ги зел неговиот син кон крајот на 80-тите и почетокот на 90-тите, излегуваат неговите одамна заборавени портрети“, велат од Културниот центар на СУ.

Изложбата содржи фотографии, копии од ракописи, извадоци од авторски текстови на Борис Мисирков и аудио снимки со фрагменти од неговите преводи.

Борис С. Мисирков (1933–1999) бил бугарски преведувач, син на доктор Сергеј Мисирков и внук на филологот Крсте Мисирков. Во 1951 година дипломирал на Руското училиште во Софија, а во 1955 година – дипломирал руска филологија на Софискиот универзитет. Од 1956 година до крајот на животот се занимавал со превод на белетристика од руски, како и од српско-хрватски и англиски јазик. Тој е основач на Сојузот на преведувачи во Бугарија и еден од основачите на списанието „Факел“.

Борис Б. Мисирков (1971) е бугарски фотограф и кинематограф. Дипломирал на Националното средно училиште за древни јазици и култури „Свети Константин Кирил Филозоф“ (1985–90), НАТФИЗ (1991–96), експериментален центар ФАБРИКА, Италија (1997–98).

Како автор работи во тандем со Георги Богданов под името Мисирков/Богданов. Тој е ко-основач на Бугарската фотографска асоцијација и ко-основач на продуцентската куќа „Агитпроп“. Работи како режисер и кинематограф на долгометражни документарни филмови, експериментални видеа и визуелни кампањи. Паралелно со својата авторска пракса, тој беше и куратор на фотографски изложби на современи бугарски автори.