Во Софија ќе се одржи меѓународен форум за развојот на Вертикалниот коридор меѓу Грција, Бугарија и Романија

Во Софија на 6 ноември ќе се одржи меѓународен форум на тема „Вертикален коридор – перспективи за развој на транспортот на Балканскиот Полуостров и улогата на Бугарија, Грција и Романија“, соопшти Бугарската трговско-индустриска комора (БТПП), пренесува БТА.

Форумот ќе започне во 10:30 часот во хотелот „Софија Балкан Палас“, а го организираат Бугарско-грчката трговско-индустриска комора, БТПП и Бугарската асоцијација на воздухопловната индустрија, во партнерство со Билатералната трговска комора Бугарија – Романија.

Главна тема ќе биде развојот на Вертикалниот коридор преку модернизација на пристаништата на Црното и Егејското Море, железничката и патната инфраструктура и прекуграничните транспортни врски.

Според БТПП, поврзувањето на пристаништата во Солун, Александруполис, Кавала, Варна, Бургас и Русе може да придонесе за полесен транспорт на стоки, нови инвестиции и подобра трговска поврзаност меѓу Јужна, Централна и Источна Европа.

Дискусиите ќе бидат насочени кон железничката и пристанишната инфраструктура, прекуграничната соработка, патните врски и мостовите на Дунав, како и можностите за финансирање преку европски фондови и јавно-приватни партнерства.

На форумот ќе учествуваат претставници на институции, пристаништа, железнички оператори, логистички компании и трговски комори.