Военомедицинската академија во Софија ќе биде домаќин на водечки специјалисти од Бугарија и странство на „Есенските невролошки денови“
Военомедицинската академија (ВМА) во Софија на 24 и 25 септември 2026 година по четврти пат ќе биде домаќин на научниот форум „Есенски невролошки денови“, на кој ќе учествуваат водечки специјалисти од Бугарија и од странство.
Учесниците ќе ги претстават најновите достигнувања во дијагностиката и лекувањето на заболувањата на нервниот систем, а во програмата се предвидени и практични семинари со реални клинички случаи и размена на професионални искуства.
Специјален гост на форумот ќе биде професорот Јорг Милер, раководител на Клиниката за неврологија при болниците „Вивантес“ во Берлин, Германија. Тој ќе одржи предавања на клучни теми и ќе учествува во клиничките дискусии.
„Есенски невролошки денови“ претставуваат можност и за афирмираните специјалисти и за младите лекари да ги надградат своите знаења и вештини преку практична и интерактивна платформа за професионална размена и обука“, изјави доцент д-р Стефка Мантарова, претседател на Бугарската асоцијација за невросонологија и мозочна хемодинамика и раководител на Клиниката за нервни болести при ВМА.
Меѓу главните теми во програмата ќе бидат невродегенеративните, демиелинизирачките и заболувањата на ‘рбетниот мозок.
Заинтересираните можат да се пријават за учество до 15 септември 2026 година на електронската адреса [email protected].
