Военопоморскиот музеј во Варна одбележува 114 години од првата голема поморска победа на Бугарија

Военопоморскиот музеј во Варна ја одбележува 114-годишнината од нападот на бугарскиот торпеден брод „Дрзки“ врз османлискиот крстосувач „Хамидие“, извршен во ноќта меѓу 7 и 8 ноември 1912 година, за време на Балканската војна. Настанот се смета за првата голема поморска победа во историјата на Бугарија, јавува Армимедија.

Во операцијата, под команда на капетанот Димитар Добрев, учествувале четири бугарски торпедни брода – „Летeчки“, „Смели“, „Строги“ и „Дрзки“. Решавачкиот удар го нанел „Дрзки“, командуван од Георги Купов, кој од растојание од околу 60 метри испукал торпедо и сериозно го оштетил османлискиот крстосувач „Хамидие“, принудувајќи го да се повлече.

Успешната акција станала симбол на храброста и професионализмот на бугарските воени морнари и зазела значајно место во военопоморската историја на земјата.

Денес, оригиналниот торпеден брод „Дрзки“ е музејски експонат во Военопоморскиот музеј во Варна, каде што е изложен од 1957 година.

Името „Дрзки“ го носи и современа бугарска фрегата, набавена од Белгија во 2005 година, која учествувала во меѓународни операции на НАТО и Обединетите нации.

Со одбележувањето на годишнината, музејот го зачувува споменот за учесниците во историската поморска операција и за традициите на бугарската воена морнарица.