Заеднички проект ќе ги поврзе 20 млади ликовни уметници од Бугарија и Грција

Дваесет млади ликовни уметници од Бугарија и Грција ќе бидат претставени во заеднички проект меѓу Софија и Солун, кој започнува на 11 септември 2026 година со изложбата „Граници / Σύνορα“ во Софија, јавува Радио Бугарија.

Иницијативата е на организацијата The Artist at Play, во партнерство со Гете-институт Бугарија и Гете-институт Солун, а целта е воспоставување потрајни врски меѓу современите уметнички сцени во двете соседни земји.

Во првата фаза, десет грчки уметници ќе бидат претставени во галеријата на Гете-институт и во галеријата Doza во Софија. Еден месец подоцна, десет бугарски уметници ќе гостуваат во Солун.

Во Софија ќе се претстават Дафни Власиду, Костас Ксантис, Константина Факу, Александра Папавасилиу, Георгија Созу, Марија Ана Сауриду, Евстатија Савиду, Калиопи Фесара, Анета Тимотеу и Софија Киуси.

Проектот го поставува во фокус парадоксот дека, и покрај географската близина, слободното движење во Шенген и интензивните контакти меѓу Бугарија и Грција, современите уметнички сцени во Софија и Солун и натаму се релативно слабо познати една на друга.