(Видео) Започна живописувањето на бугарскиот православен храм „Св. Јован Рилски“ во Лондон

Започна живописувањето на православниот храм „Св. Јован Рилски“ во Лондон, што претставува значаен чекор во довршувањето на духовното средиште на бугарската заедница во британската престолнина, објави порталот bgben.co.uk, пренесува Радио Бугарија.

Целокупната иконографска програма е изработена од иконом д-р Добромир Димитров, парохиски свештеник во храмот, во согласност со православните канони и традиции. Во подкуполниот простор се изработува композицијата „Причестување на светите апостоли“, а во пандантивите ќе бидат претставени Воскресението, Рождеството Христово, Крштението и Распетието.

Во олтарниот дел се живописува сцената „Богородица – поширока од небесата“, со Божјата Мајка и Младенецот Христос. Под неа ќе бидат претставени светите отци-литургисти Св. Василиј Велики и Св. Јован Златоуст.

Живописувањето го изведуваат иконописците отец Добромир Димитров и Галин Ганчев, дипломирани на насоката „Иконографија“ при Православниот богословски факултет на Великотрновскиот универзитет „Св. Св. Кирил и Методиј“. Поддршка за довршување на храмот може да се уплати на банкарската сметка на бугарската православна заедница „Св. Јован Рилски“ во Лондон.