Зеленски: Со блокирањето на договорот за жито, Русија врши притисок врз глобалниот пазар
Украинскиот претседател Володимир Зеленски изјави дека Русија ја блокира работата на Црноморската иницијатива за жито со цел да изврши притисок врз глобалниот земјоделски пазар.
„За Русија ова е формат на дампинг на пазарот на жито и земјоделски производи со цел да се блокира Украина и да биде единствениот голем извозник од овој регион. Апсолутно е јасно: тие користат притисок за да ги решат своите политички прашања и да заработат пари за нивните компании“, рече Зеленски во интервју со претставници на африканските медиуми, објави претседателската прес-служба, пренесува Укринформ.
Како што наведе, Русија врши притисок врз земјите од Африка, Азија и европскиот континент, како што тоа го правеше со енергијата, нафтата и гасот.
Вчера Русија го објави своето излегување од договорот за извоз на жито што беше потпишан на 22 јули 2022 година во Истанбул за 120 дена и неколку пати беше продолжен.
