Желјазков: Бугарија ќе ги прекине договорите за транзит на руски гас следната година

Бугарија планира да стави крај на договорот за транзит на руски природен гас уште во текот на следната година. Веста ја соопшти бугарскиот премиер Росен Желјазков, кој моментално престојува во САД на Годишната сесија на Генералното собрание на Обединетите нации, јавува БГНЕС.

„Во однос на повикот на претседателот Доналд Трамп што беше истакнат за време на сесијата, ние како дел од Европската Унија ќе се придружиме на одлуките на Унијата – во краткорочен аспект, од 2026 година да бидат прекинати договорите за користење или за транзит на руски природен гас,“ изјави Желјазков, пренесува БНР.

Премиерот додаде дека долгорочната цел е до 2028 година рускиот гас целосно да биде исклучен од бугарскиот енергетски пазар. Според него, сегашната потрошувачка на природен гас во земјата – како за индустриските капацитети, така и за домаќинствата – е обезбедена преку увоз на течен гас што се доставува преку специјализирани терминали.

Во рамките на посетата на бугарската делегација во САД, Бугарскиот енергетски холдинг (БЕХ) потпиша Меморандум за разбирање со Универзитетот на Северна Дакота за истражување на реткоземни метали. Според најавите, заедничките програми со UND ќе бидат насочени кон развој на научниот и технолошкиот потенцијал за преработка на лигнитни јаглени од Марицкиот басен.