Желјазков: Од премиерот Мицотакис добив уверување дека граничната блокада ќе се реши во наредните денови

„Добив уверување од премиерот Мицотакис дека прашањето со блокадата на границата ќе биде решено во наредните денови.“ Ова го изјави бугарскиот премиер Росен Желјазков по разговор со неговиот грчки колега Кириакос Мицотакис, јавува БГНЕС. Во Париз, каде што учествуваа на состанокот на Коалицијата на подготвените, двајцата ја разгледаа темата за блокадите од страна на грчките земјоделци на граничните премини и на главните патни артерии меѓу Грција и Бугарија, соопштија од владината прес-служба.

Желјазков истакна дека темата е од значење не само на билатерално ниво, туку и го засега нормалното функционирање на европските транспортни коридори, заедничкиот пазар и слободното движење на луѓе и стоки. Ова е прашање што е во интерес на бугарските превозници, но во исто време и во интерес на грчката индустрија и на грчките земјоделци, нагласи Желјазков, потсетувајќи дека Бугарија и Грција се дел од шенгенскиот простор.

„Станува збор за принципи што се наднационални“, додаде Желјазков. Премиерот беше категоричен дека позицијата на бугарските превозници е праведна и дека Владата работи на нејзина заштита.