Општина Софија, НАТФИЗ, НМА и НХА ќе соработуваат за доброто на младите таленти
Општина Софија, Националната академија за театарска и филмска уметност „Крсто Сарафов“ (НАТФИЗ), Националната музичка академија „Проф. Панчо Владигеров“ (НМА) и Националната академија за ликовна уметност (НХА) ја зацврстија соработката со меморандум потпишан од ректорите на трите академии и градоначалникот на Софија, јавува БНР.
Градоначалникот на Софија Васил Терзиев ја истакна својата визија младите уметници од овие академии да бидат интегрирани во урбаната средина. Тој предложи: „Секој подлез кој ќе го исчистиме и обезбедиме да стане како мала галерија. Секој градски простор да биде место за изложување на скулптури на млади автори.“
Ректорот на НАТФИЗ, проф. Мирослав Дачев, во духот на Страсната седмица, истакна: „Софија ја гледам како небесниот Ерусалим, еден вид мечта. Ние сме тука бидејќи веруваме дека постојат многу начини да се прави култура, но еден од најсигурните е кога трите академии за уметност и општината ќе се здружат.“
Ректорот на НХА, проф. Георги Јанков, нагласи дека новата форма на соработка овозможува реализација на проекти со пошироки хоризонти. Тој додаде: „Од секогаш сме соработувале со општината, но оваа иницијатива ни овозможува нови перспективи за иднината.“
Професорот Сава Димитров, ректор на НМА, му се заблагодари на градоначалникот Терзиев за неговиот поглед кон трите академии како извори на талент: „Треба да размислиме за изградба на специјализирани објекти за културни настани во Софија. Тие простори треба да бидат насочени кон музиката, уметноста и театарско и филмско претставување, според највисоките европски стандарди.“
