Трамп: Американска воздушна поддршка и европски копнени сили е можно да станат дел од гаранциите за Украина

Американскиот претседател Доналд Трамп изјави дека идните безбедносни гаранции за Украина може да вклучуваат американска воздушна поддршка и испраќање европски копнени трупи, јавува БГНЕС. Тој предупреди дека ситуацијата може да стане „тешка“, доколку преговорите меѓу Москва и Киев пропаднат.

„Кога станува збор за безбедноста, европските сојузници со кои се сретнав во Белата куќа во понеделник, се подготвени да испратат свои војници на терен,“ изјави Трамп за „Фокс њуз“. „Ние сме подготвени да помогнеме со одредени работи, најмногу по воздух, затоа што никој нема такви можности какви што имаме ние.“

Трамп категорично нагласи дека американски копнени трупи нема да бидат распоредени во Украина и ја отфрли можноста земјата да стане членка на НАТО. Според него, Франција, Германија и Велика Британија се подготвени да испратат свои сили. „Не мислам дека тоа ќе биде проблем. Искрено, сметам дека Путин е веќе уморен од оваа војна,“ додаде тој.

Американскиот лидер најави дека работи на организирање директна средба меѓу Владимир Путин и Володимир Зеленски, по што би следела и трилатерална средба со негово учество. „Разговарав со претседателот Путин, се обидуваме да организираме средба со Зеленски. Ако тоа успее, тогаш ќе се приклучам и ќе ги финализираме работите,“ рече Трамп.

Тој повтори дека Украина треба да прифати дека нема да ги врати изгубените територии, вклучувајќи го Донбас. „Голем дел од територијата е под руска контрола. Донбас во моментот е 79% под руска власт,“ изјави Трамп.

„Ова е војна, а Русија е моќна воена држава – многу поголема од Украина. Не можеш да се соочиш со земја што е десет пати поголема,“ нагласи тој.

Според Трамп, Киев мора да покаже флексибилност: „Украина ќе си го врати животот – ќе престане да губи луѓе и ќе зачува значителен дел од својата земја. Ќе добијат мир.“