Франција и Германија со дополнителна поддршка за украинската воздушна одбрана по руските напади

Франција и Германија ќе ѝ обезбедат дополнителна воена техника за воздушна одбрана на Украина по „масовните“ руски воздушни удари во изминатите денови, соопштија двете клучни членки на Европската унија во заедничкa изјава, јавува АФП, пренесува БГНЕС.

„Франција и Германија ќе обезбедат дополнителна воздушна заштита за Украина“, се вели во соопштението објавено по посетата на германскиот канцелар Фридрих Мерц на Франција, организирана од претседателот Емануел Макрон. „И покрај интензивните меѓународни дипломатски напори, Русија не покажува намера да ја прекине својата агресивна војна против Украина.“

Во најсмртоносниот напад врз Киев во последните месеци, руски ракети и дронови погодија станбени згради во главниот град, при што загинаа најмалку 23 лица, меѓу нив и четири деца, а околу 50 беа повредени.

Франција – единствената нуклеарна сила во ЕУ – и Германија дополнително најавија отворање на „стратегиски дијалог“ за нуклеарно воздржување во светлото на заедничките безбедносни предизвици.

Целта е развивање на „заедничка стратегиска култура“ и понатамошно поврзување на целите и стратегиите во областа на безбедноста и одбраната. Нуклеарното воздржување останува „клучен столб“ на безбедноста на НАТО, нагласуваат двете земји.