Музеј „Борис Христов“ со богата програма за Европските денови на наследството

Музејот „Борис Христов“ во Софија ќе се вклучи во одбележувањето на Европските денови на наследството со специјална програма, јавува БНР. На 20 септември, од 11:00 до 18:00 часот, посетителите ќе можат да ја разгледаат изложбата „Борис Христов – костими и улоги од оперската сцена“, која открива дел од најемблематичните сценски остварувања на големиот уметник.

Од 11:00 до 14:00 часот во рамки на настанот ќе бидат изведувани снимки со интерпретации на Борис Христов на арии од опери на Волфганг Амадеус Моцарт, Кристоф Глук, Винченцо Белини, Џузепе Верди и Ариго Боито, информира директорката на музејот Елена Драгостинова за Радио Софија.

„Она што сакаме да им го претставиме на посетителите е изложба и музика. Изложбата е мошне интересна – фотографии со кои се откриваат стремежите на Борис Христов неговите костими да бидат во целосна хармонија со содржината на операта, епохата и визијата за создавање на еден лик“, објасни Драгостинова.

Во изложбата се претставени 35 фотографии со костими и улоги на Христов, дел од архивата на музејот кој постојано се обновува. „Тој настојувал неговите идеи за костими да бидат почитувани на секоја сцена каде настапува. Оваа изложба го покажува неговиот упорен стремеж и високите критериуми“, додаде таа.

Настанот е со бесплатен влез.

Исто така, на 13 септември музејот ја претстави ретката снимка на „Дон Кихот“ од 25 мај 1957 година, во која настапуваат Борис Христов, Тереза Берганца и Карло Бадиоли, под диригентство на Алфредо Симонето. Важно е да се истакне дека Христов партијата на Дон Кихот ја изведол само еднаш – не на театарска сцена, туку на концерт во Аудиториумот на РАИ во Милано.