„Чипови на Европа“ – нов европски проект во кој учествува и Бугарија

Проектот „Chips of Europe“ се финансира од европската програма „Дигитална Европа“, која е релативно нов инструмент за поддршка на истражувања и иновации. Во неговата реализација се вклучени 20 научни институции, водечки индустриски партнери и невладини организации од 10 европски земји, меѓу кои е и Бугарија, јавува БНР.

Координатор на проектот е Високото училиште за применети науки во Минхен, а дел од конзорциумот е и Центарот за истражување и анализи – здружение во јавен интерес, предводено од проф. Албена Вуцовa.

Во изјава за бугарските медиуми, проф. Вуцова нагласи дека проектот е особено значаен затоа што за првпат става јасен акцент на производство на микроелектронски елементи во Европа. Досега овој сегмент беше во голема мера изнесен надвор од континентот, што создаваше долги и ранливи синџири на снабдување.

Главната цел е да се изработат заеднички образовни програми, преку кои ќе се обучат околу 350 илјади стручњаци потребни за производство на чипови. Според Вуцова, Бугарија е добро претставена во рамките на иницијативата, што отвора простор за регионално влијание и идни партнерства.