Британија распореди војници во Израел како дел од мисија за следење на примирјето во Газа

Британското Министерство за одбрана потврди дека „мал број“ британски војници се распоредени во Израел како дел од мисија предводена од САД, која има цел да го надгледува почитувањето на примирјето во Појасот Газа, јавува БГНЕС.

Британскиот министер за одбрана, Џон Хили, изјави дека Обединетото Кралство ќе има „водечка улога“ во напорите за одржување на примирјето, по барање на американската страна.

„Можеме да придонесеме во набљудувањето на прекинот на огнот,“ изјави Хили на настан во центарот на Лондон.
„Како одговор на американското барање, испративме висок офицер со чин на двозвезден генерал во заедничката цивилно-воена команда како заменик-командант. Така Британија ќе биде столб на оваа операција,“ додаде тој.

Потврдата дојде во истиот ден кога потпретседателот на САД, Џеј Ди Ванс, го отвори заедничкиот американо-израелски координациски центар во југозападен Израел.

Во меѓувреме, тензиите околу спроведувањето на примирјето остануваат високи. Хамас соопшти дека им е потребно време и техничка помош за да ги пронајдат телата на преостанатите израелски заложници, кои, според нив, се уште се закопани под урнатините во Појасот Газа.