Желјазков: Воведувањето на еврото ја заокружува европската економска интеграција на Бугарија
Бугарија е подготвена да биде активен и одговорен партнер во рамките на монетарната унија на ЕУ, изјави бугарскиот премиер Росен Желјазков во Брисел, јавува БГНЕС. Тој нагласи дека воведувањето на еврото е резултат на долгорочни реформи и ќе придонесе за економска стабилност, поголема доверба и нови можности за граѓаните и бизнисот.
Пред почетокот на заседанието на Европскиот совет, Желјазков ѝ подари комплет бугарски евромонети на претседателката на Европската комисија, Урсула фон дер Лајен, и ѝ се заблагодари за континуираната поддршка на Комисијата во процесот на пристапување кон еврозоната. Тој ја истакна важноста на конструктивниот дијалог и експертската помош во сите фази на подготовката.
Во разговор со претседателката на Европскиот парламент, Роберта Мецола, премиерот посочи дека членството во еврозоната е последниот чекор кон целосна економска и финансиска интеграција на Бугарија во ЕУ. Тој ѝ се заблагодари за поддршката за Бугарија, како во однос на еврозоната, така и за Шенген.
Неколку дена пред 1 јануари 2026 година, Желјазков ѝ подари комплет бугарски евромонети и на Мецола, нагласувајќи дека станува збор за историски момент за земјата. Премиерот увери дека владата ги презела сите неопходни мерки за непречен, транспарентен и успешен премин кон еврото.
