Бугарија од април воведува нови возови, најавена целосна модернизација на железницата до 2029 г.
Од април започнува поетапното воведување на нови возови за бугарската железница. До крајот на летото се очекува 34 нови возови да сообраќаат на главните линии. Останатите треба да бидат испорачани до јуни 2027 година, изјави вицепремиерот и министер за транспорт и врски на Бугарија Гроздан Караџов во утринската програма на бугарската Нова телевизија.
Според него, обновувањето на возовите е дел од поширока железничка реформа за подобрување на комфорот, точноста и квалитетот на услугата. Во моментов се работи на над 40 инфраструктурни делници, а модернизацијата треба да заврши до 2029 година.
Реформата предвидува и нов модел на финансирање. Субвенцијата по воз-километар ќе се зголеми од околу 6 на речиси 9 евра до 2027 година, што треба да обезбеди одржување, инвестиции и поголема безбедност.
Во однос на влезот на приватен оператор, Караџов нагласи дека возовите остануваат државна сопственост и ќе има контролирана конкуренција со договори за јавна услуга. Цените на билетите нема да се зголемуваат без одобрението од министерот.
Од 2027 година се предвидени и значителни зголемувања на платите за железничарите за да се привлечат млади кадри.
