Ансамблот „Лозенец“ од Софија вечерва ќе ја претстави Бугарија на фолклорен фестивал во Охрид
Фолклорниот ансамбл „Лозенец“ при Народното читалиште „Пенчо П. Славејков 1921“ од Софија вечерва од 19:00 часот ќе настапи во програмата на Меѓународниот фолклорен фестивал за деца и млади „Македонски танц“ 2026 во Охрид, јавува Бугарскиот културно-информативен центар во Скопје.
Фолклорниот клуб „Лозенец“ е основан во 2020 година од кореографот и раководител Мирослав Шијанков, кој ја продолжува долгогодишната фолклорна традиција на читалиштето. Во составот настапуваат повеќе од 20 танчари, меѓу кои има и професионални изведувачи.
„Лозенец“ има настапувано на повеќе меѓународни и национални фестивали. Меѓу неговите признанија се Гран при на меѓународниот фолклорен фестивал во Катерини Паралија, Грција, како и награди од „Estreia Dance Fest“, „Sundance Fest“ и фестивалот „Ритамот во моето срце“.
На репертоарот на ансамблот се кореографиите „Шопски танци“, „Криво оро“, „Закачка“, „Кај Дунав“ и „Варненски танц“.
