Делото против Љупчо Ѓоргиевски, претседател на КЦ „Иван Михајлов“ започнува во Апелациониот суд во Битола

Судењето против претседателот на избришаниот од Централен регистар КЦ „Иван Михајлов“ Љупчо Ѓоргиевски започнува во Апелациониот суд во Битола на 5 мај, јавува БНТ. Во јуни минатата година Основниот суд во Битола му изрече на Ѓоргиевски условна затворска казна од 1 година со 2 години условен рок. Тој беше осуден за предизвикување омраза, раздор и нетрпеливост на национална, расна, верска и друга дискриминаторска основа по електронски пат преку цитати од Иван Михајлов, објавени на страницата на здружението на „Фејсбук“.

„Судот има шанса да се докаже и да ја намали пресудата на понискиот суд. Тоа е најдобро за мене, најдобро за нашата кауза, да се покаже дека е во право. Се плашам дека може да го вратат предметот повторно во Основниот суд и да започне нова голгота од 3 – 4 години по македонските судови. Затоа што веќе поминаа 3 години откако започна ова дело.Може да донесат таква одлука, што ќе нè спречи да започнеме со нашата жалба во Стразбур. Затоа што ако апелацијата ја потврди пресудата на Основниот суд, следно ќе треба да започнеме постапка пред судот во Стразбур.“, изјави пред БНТ Љупчо Ѓоргиевски.

Постои уште една постапка против Ѓоргиевски, на која не ѝ е даден тек – за фототипското издание на „Македонска крвава свадба“ на 1 ноември минатата година:

„Веднаш заменик-претседателката на Собранието, во лицето на Весна Бендевска, поднесе пријава во обвинителството и бев повикан во својство на обвинет, но по ова дело сè уште нема ништо. Сигурно чекаат да заврши клучното, па да видат што како. Се работи за постојан притисок“, вели Ѓоргиевски.

Проблем има дури и со фототипско издание на канонизираниот за светец во Македонија Јоаким Крчовски:

„Да, тој е канонизиран за светец, за жал неговите дела не се читаат. И не се признаваат. Треба да ги издадеш фототипски, за да докажеш дека тој ги има напишано. Тие дури и ги кријат. Сигурно ги имаат по манастирите во Македонија. Оригиналните дела на Јоаким Крчовски, но вешто ги прикриваат, за народот да не ја дознае вистината. Инаку овие книшки ги издаваме во соработка со здружението „Зора“ од Ќустендил, кои се наши пријатели. И нема да запреме со тоа. Дејноста ќе продолжи. Ќе започнеме нови изданија, нови проекти. На секој начин да ја докажеме вистината.

На прашањето зошто се случува сето ова и зошто има страв да се впишат Бугарите како државотворен народ во Уставот на РСМ, Ѓоргиевски одговара:

„Затоа што ако ги впишат Бугарите во Уставот, ние ќе ги добиеме нашите човекови права во Уставот. Ќе добиеме уставни права. Има и тоа, да не се покаже дека не сме само 3000, туку дека сме малку повеќе. Со оглед на тоа што има 210 000 бугарски државјанства, така да… да не излезе поинаку. Сигурно тоа е стравот. Иако не гледам дека треба да се плашат од такви работи. Ние се стремиме да видиме европска држава со европски вредности и малку е глупаво во 21 век да му определуваш на еден човек каков сакаш ти да биде, а не тој самиот да биде тоа што сака.“

Потсетуваме дека во 2022 година бугарскиот културен клуб „Иван Михајлов“ беше запален. Во врска со палењето беше приведен локален жител – Ламбе Алабаковски. Во 2023 година македонските власти го избришаа бугарскиот клуб „Иван Михајлов“ во Битола од Централниот регистар.