Рубио: Бугарија беше меѓу најкорисните НАТО-сојузници за САД во конфликтот со Иран

Американскиот државен секретар Марко Рубио ја издвои Бугарија меѓу земјите од НАТО кои биле корисни за Вашингтон за време на војната со Иран. Во интервју за Fox News, тој упати критики кон Шпанија дека одбила пристап за американски авиони до базите на своја територија и го доведе во прашање значењето на Алијансата доколку сојузниците одбиваат таква поддршка во момент на конфликт, јавува БГНЕС.

Рубио изјави дека отсекогаш го поддржувал НАТО, вклучително и затоа што Алијансата им овозможува на САД пристап до бази во Европа кои можат да се користат при кризи на Блискиот Исток или во Африка.

„Кога партнери од НАТО ви одбиваат користење на тие бази, а главната причина поради која НАТО е корисен за Америка се негира од земји како Шпанија, тогаш која е смислата на Алијансата? Почнува да изгледа како ‘тие се сојузници кога сакаат да бидат’“, рече тој.

Државниот секретар прецизираше дека дел од земјите во НАТО биле „многу корисни“ за САД.

„Само како пример, Португалија. Тие рекоа ‘да’, уште пред да им кажеме кое е прашањето. Полска. Има такви земји, Романија, Бугарија. Други, како Шпанија, беа ужасни, навистина шокантни“, изјави Рубио.

Според него, постојат „целосно легитимни прашања“ за улогата на НАТО, доколку во момент на конфликт како овој со Иран земји-членки можат да ги одбиваат САД во однос на пристапот до бази.

„Зошто тогаш сме таму? Само за да ги браниме нив, а не и за да го браниме нашиот национален интерес? Тоа е многу легитимно прашање што треба да се разгледа“, рече Рубио.

Тој ја коментираше и војната во Украина, наведувајќи дека единствено САД можат да посредуваат за дипломатско решавање на конфликтот.

„Подготвени сме да помогнеме за дипломатски крај на војната“, изјави Рубио за Fox News.

Според него, на Украина можеби ќе ѝ бидат потребни две децении за да ја обнови својата економија по војната. Тој изрази надеж дека двете страни наскоро повторно ќе ги обноват преговорите.

„Подготвени сме да ја одиграме улогата на посредник и да го доведеме ова до крај. Мислам дека сме единствената земја во светот што може да го направи тоа. Ако некој друг сака да се обиде, нека го направи, но и двете страни ни велат дека ние сме единствените што можат“, изјави државниот секретар.

Рубио додаде дека Украина во моментов располага со најсилната армија во Европа поради акумулираното борбено искуство и големата помош што ја добила.

„Украинските вооружени сили во моментов се најсилните и најмоќните во цела Европа, во голема мера поради помошта што ја добиле, но и поради борбеното искуство што го стекнале“, посочи тој.

Државниот секретар изјави дека Русија продолжува да трпи огромни загуби на бојното поле.

„Русите губат по 15-20 илјади војници месечно, убиени. Не ранети, туку токму убиени“, рече Рубио.

Тој призна дека во последните месеци инерцијата околу преговорите ослабнала, бидејќи и двете страни гледаат причини за оптимизам. Украина е поуверена во своите позиции на фронтот и ја поминала зимата, додека Русија се чувствува посигурна поради растот на цената на нафтата, изјави Рубио.

Сепак, Вашингтон се надева дека Москва и Киев ќе се вратат на преговарачката маса.

„Се надеваме, дали поради изјавата на Владимир Путин, или поради други причини, наскоро да стигнеме до момент кога двете страни повторно ќе се вратат на преговарачката маса“, додаде тој.