Јотова: Бугарија може да биде дигитален и индустриски центар на Европа
Претседателката на Бугарија, Илијана Јотова, на отворањето на форумот „Green Transition Forum 6.0: Europe’s Next Chapter“ изјави дека Бугарија има потенцијал да стане дигитален и AI центар, индустриски партнер и глас на кохезионата политика во новата европска конкурентност, јавува БГНЕС.
Јотова истакна дека конкурентноста денес е прашање на суверенитет, работни места и социјална стабилност, предупредувајќи дека новите европски приоритети – одбраната, иновациите, вештачката интелигенција и енергетската безбедност – не смеат да се развиваат на сметка на кохезионата политика. Таа нагласи дека Европа нема да ја обнови конкурентноста преку нови поделби, туку преку зближување, силна енергетика, модерна инфраструктура и рамноправно учество на сите земји-членки.
Според Јотова, дебатата за буџетската рамка на ЕУ за периодот 2028–2034 ќе покаже дали Унијата ќе остане сојуз на солидарност или ќе се претвори во Европа со различни брзини. Таа предупреди дека моделот „Европа на две брзини“ носи ризик од политички поделби и нови невидливи граници во Унијата.
Јотова посочи и на стратешката улога на Бугарија во енергетската и транспортната поврзаност, вклучително и преку вертикалниот гасен коридор и транспортната оска Југ–Север. Дополнително, изборот Бугарија да биде домаќин на една од европските AI гигафабрики, според неа, ги потврдува можностите на земјата како дигитален центар.
„Ако нема рокови, нема спроведување. Ако нема спроведување, нема доверба“, изјави Јотова, предлагајќи ЕУ да усвои Европски пакт за реализација со мерливи цели до 2030 година.
