Александар Јанев стана првиот бугарски студент со коавторство на научна публикација прифатена на престижна конференција во Денвер

Александар Јанев стана првиот бугарски студент со коавторство на научна публикација, прифатена на Конференцијата за компјутерска визија и вештачка интелигенција во Денвер. Форумот се смета за најпрестижен во светот, соопштија од бугарскиот Институт за компјутерски науки, вештачка интелигенција и технологии (INSAIT), пренесува БНР.

Младиот научник е студент во трета година на Софискиот универзитет „Св. Климент Охридски“ и учесник во програмата Explorer – четиригодишна додипломска иницијатива на INSAIT за развој на млади бугарски таленти. Уште како ученик освојува признанија на меѓународни натпревари по информатика, меѓу кои Romanian Masters of Informatics и Меѓународната Жаутиковска олимпијада.

Во Институтот за компјутерски науки, вештачка интелигенција и технологии Александар Јанев работи врз следната генерација AI за роботика. Од INSAIT дополнуваат дека статијата SPEAR-1, на која е коавтор и која е објавена од изданието Wired, претставува важен чекор токму во оваа насока.