ЕУ ги отфрла дестабилизирачките активности на Русија во Западен Балкан
Европската унија соопшти дека ги отфрла дестабилизирачките активности на Русија во Западен Балкан и дека односите со Москва не можат да продолжат како вообичаено „додека режимот на Владимир Путин ја продолжува агресијата врз Украина“, јавува БГНЕС.
Во врска со соработката меѓу полицијата на Република Српска и Москва, Европската комисија изјави за РСЕ дека ентитетите во Босна и Херцеговина имаат право да развиваат меѓународна соработка во областите за кои се надлежни, но мора целосно да ги почитуваат Уставот на БиХ и одлуките на државните институции.
„Надворешната политика во БиХ е исклучива надлежност на државата, додека ентитетите имаат уставна обврска да им помагаат на државните институции во исполнувањето на обврските“, наведоа од Европската комисија.
Министерот за внатрешни работи на Република Српска, Жељко Будимир, на 23 јуни во Москва потпиша меморандум за соработка со Олег Баранов, началник на Главната управа на Министерството за внатрешни работи на Руската Федерација за град Москва, кој е под санкции на ЕУ.
Соработката, воспоставена пред повеќе од десет години, опфаќа размена на информации, професионална обука и заедничко дејствување во борбата против тероризмот и други форми на криминал. Текстот на новиот меморандум не е објавен.
Европскиот парламент на 17 јуни усвои резолуција за БиХ, во која ја осуди соработката на властите во Република Српска со руски претставници под меѓународни санкции, предупредувајќи дека таквите односи претставуваат ризик за безбедноста и стабилноста на БиХ.
Иако БиХ формално се приклучи кон санкциите на ЕУ против Москва по почетокот на руската војна против Украина во 2022 година, нивното спроведување наидува на отпор од политичари во Република Српска.
