Со воен ритуал пред „Мајка Бугарија“ одбележано Соединението во Велико Трново

Во Велико Трново со воен ритуал, со ѕвонење на камбаните и положување цвеќе беше одбележано Соединението на Кнежеството Бугарија со Источна Румелија. Голем број граѓани присуствуваа на свеченоста пред споменикот „Мајка Бугарија“, јавува БНР.

Во градот, каде што Соединението за првпат било признато како политички чин од кнез Александар I, а подготовките за обединувањето започнале уште во 1878 година со формирањето на првиот комитет „Единство“, националното знаме беше кренато пред зградата на Општина Велико Трново.

Пред споменикот „Мајка Бугарија“ беа положени цвеќиња во знак на почит кон учесниците во историските настани.

Протоереј Славчо Иванов одржа празничен благослов.

„Да им благодариме на нашите предци, кои успеале да го остварат ова Соединение на Кнежеството Бугарија со Источна Румелија“, рече Иванов.

Граѓаните на Велико Трново им оддадоа почит на учесниците во настаните поврзани со Соединението, нагласувајќи ја потребата од единство и денес.

„Најголемиот празник – Обединување на Бугарите. Но, за жал, сè уште не сме сите обединети“, изјави еден од присутните.

„Треба да го всадиме патриотизмот кај нашите деца, бидејќи токму сега, во оваа разединетост, треба да бидеме обединети околу една добра кауза“, рече друг граѓанин.

„Со работите што се случуваат денес, повеќе од кога било е потребно да бидеме обединети. На Бугарија ѝ е потребен обединет народ“, изјави учесник на свеченоста.

Курсантите од Националниот воен универзитет продефилираа во свечен марш.

Во вечерните часови е предвидено прикажување на спектаклот „Звук и светлина“.