„Хераклејски празници на уметностите“ собра творци од Бугарија и Грција

Петрич и грчката општина Серес ја продолжуваат културната соработка со изложба на 15 уметници од Серес, организирана во рамките на второто издание на фестивалот „Хераклејски празници на уметностите“. На отворањето беше договорено и возвратно гостување на уметници од Петрич во Серес во 2027 година, јавува Пиринско.

Изложбата „Уметниците на Серес“ е поставена во Уметничката галерија во Петрич и ќе биде отворена за посетители до 16 октомври.

На официјалното отворање присуствуваа гости и локални уметници. Поздравно обраќање имаше заменичката на градоначалникот на Серес задолжена за туризам и меѓународни активности, Лемонија Кесули. Преку видеопорака од Тасос Хаџивасилиу беше пренесена и поздравна порака од министерот за надворешни работи на Грција.

Културната програма продолжи на отворената сцена на античкиот форум во Хераклеја Синтика, со концерт на пијанистот и композитор Јоргос Андреу и пејачката Корина Легаки.

Фестивалот е дел од политиките на општина Петрич за зачувување на културно-историското наследство. Тој се надоврзува на резултатите од проектите „Културен дипол“, реализирани преку програмата ИНТЕРРЕГ V-А Грција – Бугарија, како и од реставрацијата и уредувањето на античкиот град Хераклеја Синтика за посетители.